صار الولد كبير .. لك لاء لساته صغير

اولا : الله يديم علينا اهلنا و لا يحرمنا منن ..
ثانيا : الموضوع يتناول احد جوانب ( حرص الاهل على الابناء) و لكن بطريقتنا الساخرة ..

يحرق حريش هالشغلة معكن يا أهالينا الكرام , مافي الا و عم يتخرج من تحت ايدكون اجيال فايتة بالحيط
بالفعل شغلتكن شغلة .. لسا فايتين طالعين على قولة الولد كبر , لاء الولد لساتو صغير
على قولة انت صرت شب عيب تعمل هيك , و على قولة لسى ما فقست البيضة عنك
بيجي هاد بيقك صرت قد اللوح لا تساوي هيك , بتجي هديك بتقله لك لساته فصعون
اي اعتمدوا على رأي بئا ..

تعوا لاعطيكون مثال على احد الابناء خلال سلسلة حياته نموه , و نلقي الضوء على جانب من جوانب حياته مع اهله :
قال كان يا مكان ,, بقديم الزمان , و سالف العصر و الآوان , كان في ولد اسمه باسم , كان الولد ناجح عالصف السادس الابتدائي ( يعني 12 سنة ) و راجع من عند ابو سامر البقال و بيده سطل لبن .. هو و راجع عالبيت , فجأة .. بيتفركش بالرصيف و بيوقع سطل اللبن !

بيرجع الولد عالبيت , و بتخانقه امه و بتقول :
" لك صرت شب انت , مو عيب تكب السطل متل الولاد الصغر ؟؟ "
هاد الولد فكر حاله عن جد شب ! راح قال لاهله المسويات :
" انا طالع من البيت اتمشى انا و رفيقي عباس " .. رد عليه ابو للولد و قال :
" بابا حبيبي الساعة 10 بالليل هلئ , ما بيصير تطلع , لساتك صغير , شو هي طالع اتمشى بنص الليل انا ورفيقي , فوت نام لشوف"

مالكن بطول السيرة , مضت كم سنة , صار الولد , قصدي الشب عمره 16 سنة , و صار صف عاشر
( اس الله ايام المدرسة شو كانت معته وسئيلة ,, يع .. قال مدرسة قال .. يععع )
المهم , قال الولد لابوه : بابا .. هلئ انا مو صرت شب ؟
- اي بابا ,, انت صرت شب و بيعتمد عليه كمان , خزيت العين حولك .- طيب يا بابا , جعبالي متل كل الشباب ,, صير دخن سيجارة , هتلك وحدة من هالباكيت يلي بجيبتك لشوف !مد الاب ايده و ضرب الولد كف على وشه و فتله 4 او 5 فتلات , و قله " بابا .. يا دب .. هي السيجارة للكبار و بس ,, انت لساتك فصعون !

يحرق يحرق ... لك هاد الولد فات بالحيط تماما من ورا هالشغلة .. ساعة بيقلولو صغير , و ساعة بيقلولو انت كبير
و مضت الايام ,, و صار عمره 18 سنة , سنة تنطح سنة ..
و رجع الولد عالبيت من عند رفقاته , و اتجه باتجاه غرفة ابوه ,, فتح الباب و قال لابوه . بابا .. بدي هلئ هلئ سيارة , شو غيث رفيقي اسحن مني لحتى يكون عنده Mazda ؟؟ ليش هو عنده و انا لاء ؟ انا صرت رجال و عمري 18 سنة بابا
نطت الام من غرفة القعدة و صرخت من بعيد : لك انت شو مفتكر حالك ؟ لسى ما صرلك مطبئ ال18 يومين و بدك سيارة لتروح تفتل و تصيع مع رفقاتك لانصاص الليالي ..لكن بكرا بس تصير بالـ 30 شو بدك تطلب ؟ اه ؟؟

و مضت السنين و الايام , و كبر الولد , قصدي الرجال , وصار عمره 21 سنة , و شاف هالشباب يلي عندن اتاري و play station و مدري شو .. راج لعند ابوه و قله : بابا ,, بدي منك 5000 ليرة دين , عم جمع حق جهاز PlayStation 2 تبع الالعاب , حقه 12000 , بتديني ؟
ضحك الاب و قال : لك بابا ,, هاد الجهاز للولاد الصغار , مو الك ,, انت كبير و رجال , و عقلك اكبر من هيك , شو هي اتاري ما اتاري بابا , شو اجدب انت ؟

و تمضي الايام و السنين .. و بيوم من الايام , رجع الشب يلي صار عمره 24 سنة عالبيت و قام لقى امه عم تزوره , ققال الولد لامه , خير ان شاء الله , شبك عم تزوري ..؟قالتلو الام : و لاه دب .. انت مو عيب عليك صرت قد اللوح , قد الحمار , و قاعد عم تلحقلي بنات الحارة و تلطشن ؟ مو عيب عليك , شو مفتكر حالك لساتك مراهق انت ؟الولد كن على جرحه , و قال لامه .. اذا انا صرت كبير ..بدي ئلك على شغلة :في بنت جيرانا سميرة , حبيتها كتير كتير , و بدي اتجوزها , مو انا صرت شب ؟رد عليه ابوه من المطبخ : " لك يا بابا , انت لساتك صغير حبيبي , الزواج بدو مسؤولية , شو الشغلة شوربة ؟ العمى بقلبك شو مالك عرفان شو يعني جواز ؟

و من هون اعزائي القراء ,, منكتشف احد العوامل المؤثرة في جعل جيل الشباب الجديد فايت بالحيط بشكل افتراضي .. فكيف وقت رح يتجوز هاد الجيل من الشباب من بنات هالجيل الجديد يلي طالع ؟؟ شو بتتوقعوا رح تطلع النتيجة ؟؟ ولسا بتقولوا دول نامية :)