.: مختبرات الجولدن التقنية :.

الأحد، كانون الأول ٣٠، ٢٠٠٧

عم ئلك شو ولد ...

بإعتبار صرلي فترة مو مكمل سلسلة فاس توريماكس , حبيت حط فاصل إعلاني تحشيشي .. :p

إتحاد الجولدن الديمقراطي الشعبي
الإداره العامة لمختبرات الجولدن التقنية
فرع حشيش منتصف الليل


تقدم

عم ئلك شو ولد ..


سلسلة تحشيشية تفاعلية



البداية :

هادا يا سادة يا كرام ..
محسوبكن الجولدن قاعد عالكمبيوتر .. و الساعة تتجه ارقامها الديجيتال نحو الرابعة صباحا ً بتوقيت مختبرات الجولدن التقنية ..
لابس الشورت , كالعادة ..
و عم اعلك مسكة ..
و الهوا زمهرير و عم يقلع الشجر برات البيت , و عم يلعب لعب ..

و فجأة !!!


و من دون سابق إنذار ..


بتذكر شغلة صارت معي اليوم .. اي نعم ... تذكرت !! تصوروا !؟

حبيت جيب هالقصة , و حطها باحد الكمبيوترات بالمختبرات التقنية , و اعملي عليها شوية تجارب تحشيشية ...

و إليكم النتائج :


في واحد بعرفه بالشغل , درويش , حالته المادية كما يقول المتل :: عالحديدة ...

و انا بتصور , مو صفيان عندو ولا حتى .. حديدة !



المهم هاد الاخ الكريم الاكابر , اجا عم يقلي انو شافني بالمنام ( خير بالصلاة عالنبي )
قال كامش ابني الصغير .. و عم فتلو بالجنينة مع البطات , و قال هالولد شي حليوا كتير ( طالع لابوه:d )
المهم , و يلي هو لب الحديث .. انو هالزلمة هاد شلون كان وصفه للولد يا حزركن ؟

كان الوصف بأكتر شي هامه حالياً بالحياة , او خلينا نقول اكتر شي شاغل باله ,
يلي هو :: المصاري ::

فبإعتبار الاخ مستوي مادياً و الشغلة يلي كتير بتبهره هي المصاري ,, فقال لي :

والله يا معلم هالولد شو حلو ... عم ئلك ... متل الليرة !!


متل الليرة !


طيب ..


ياترى لو كان الاخ رومانسي , او كاتب اشعار , شو كان قال ؟

انا بقلكن ..


كان قلي :

والله يا معلم هالولد شو حلو عم ئلك .. متل الوردة !

حلو .. بلش التحشيش ياخد مجراه !
لو كان صاحبنا .. او خلينا نقول صاحبتنا , وحدة محجبة .. شو كانت قالت ؟
والله يا أخي هالولد شو حلو عم ئلك .. متل النقطة بالمصحف !!


لو كانت كمان صاحبتنا قائلة الجملة هي ست كبيرة بالعمر من هدول الشوام العتئ , كانت قالت :
والله يا تئبرني هالولد شو حلو عم ئلك .. متل فلقة القمر ..


طيب , خلونا ندخل شوية بئا لبعض الشخصيات العالمية ..

الرئيس الإيراني أحمد نجاد :
والله يا جولدن , هاد الولد شو حلو عم ئلك .. متل المفاعل النووي !

الرئيس الاميركي جورج بوش الاجدب :
والله يا معلمي و تاج راسي يا جولدن , your son is like the American flag

الرئيس الفرنسي :
مسيو جولدون .. ابنك طالع متل قنينة بارفان من كريستيان ديور !

الرئيس الروسي :
مئلم جولدينوف .. ابن حضرتكم متل صاروخ سكود 3 عابر قارات عم يلمع الستانليس تيل تبعو
بيل غيتس - صاحب مايكروسوفت
والله يا جولدن هالبابي تبعك متل الوندوز 7 الجديد ..

لينوس ترافولد - مطور نظام لينوكس
غولدن باشا , هاد ابنك خزيت العين طالع متل الكيرنل kernel 2.7


طيب ,,, خلوني خلينا نعمل إسقاط على تعليقات بعض السادة ذوي الشخصيات العالمية حول رائيهم بهاد الحدث الهام ..
فؤاد السنيورة
لا تعليق .. يجب عليي ان استشير كونوليزا رايس اولا ً
جنبلاط
شوف .. انا رح فوت ضغري بالموضوع معك إن اي تحرك لابنك مع الكريجية او بدونها , مع اللهاية او بدونها سيكون له عواقب وخيمة
و نحن نعلم مسبقا ً ان طفلك هذا سيكون له دور بعد 24 عاماً بتنفيس إطارات سيارة النائب هشتك بشتك .
أحد قراء موقع سيريا نيوز
يعني والله قصة , لسا بتعيشنو باحلام و اوهامنحن لساتنا عم نحكي بالطفل , في حين العالم بأميركا و صلت عالقمر !
بابا نويل السابع عشر
We wich you a merry christmas and happy new year
الجولدن : لك حبيبي نحن بسيرة الولد و انت عم تقلي كريسماس ؟
بابانويل : يمكن انت ما سمعتني منيح , اناعم قول we wich you a merry christmas and happy new year
جورج بوش
ليديز ان جينلمنز , الـيونايتد ستيت انتيليجنت سايبر أرمي ايجنسي اكتشفت انو هالولد هو غطاء يخفي تحته مشروع انقلابات خطيرة في بعض الدول المجاورة , و سنرفع طلبنا بفرض عقوبات على مختبرات الجولدن التقنية لدى الامم المتحدة
ساركوزي
إن العلاقات بين فرنسا و مختبرات الجولدن التقنية ليست على ما يراملكن هذا لن يمنعنا من تهنئتهم بمناسبة المولود الجديد
عضو في الكنيست
يجب على العالم أن يدرك بأن لأطفال اسرائيل الحق ايضا بان يكون لديهم مواضيع في المدونات والمنتديات العربية
وهذه الخطوة ستكون هامة نحو التطبيع مع إدراة مختبرات الجولدن التقنية .

مارح حط اكتر من هيك ... لانو الطاقة الكهربائية بالمختبرات عطتني Alarm



رح أعطي القراء القيادة و الكونترول .. ورجونا انتوا طلع معكن شي ؟


شلون شفتلونا الجولدن الثالث بالمنام ؟
شلون شفتولنا ولي عهد مختبرات الجولدن التقنية ؟


سلامت

الخميس، آذار ٢٩، ٢٠٠٧

فاس توريماكس 4 : الديجافو - Deja vu

قبل أن القراءة : قم بتغير إتجاه الصفحة من اليمين إلى اليسار و ذلك بالضغط على زر الفأرة الايمن و اختيار الترميز ( انكودينغ) و اختيار الاتجاه من اليمين إلى اليسار . كما يجب أن تقراء (فاس توريماك 3) قبل الشروع في قراءة الرقم 4 ( هذا )


غالبا ما نكون في عملة معالجة لـunit ما في داخل برنامج الحياة هذا الذي نعيشه .,

فنكون على سبيل المثال داخلين الى السوبر ماركت لشراء سطل لبن مثلا ..
فنرى ان الشاب الذي سيخرج السطل من البراد
: بداية المشهد :
ابتسم اثناء فتح باب البراد .. يمكش بقبضة السطل ليقوم بسحبه , يدر وجهه باتجاهي لكنه مستمر بالسحب
فتعلق قاعدة السطل بحافة الرف , فيميل السطل باتجاه الشاب ( انتهى المشهد )

هنا و فجأة ,, بيصير معك عملية freez ... و بتصفن ... و بتغيييييب , و خلال اجزاء من جزء الثانية ....
بتلاقي انو CPU ( عقلك ) اشتغل بسرعة و بقوة..
و اخدك على sector معين لا تعرف مكانه تماما ,, لكنه موجود في الـHard disk تبعك (يعني بمخك )
او في اله اثر لسا بالRAM على الاقل ..

ياااااه ,, ملف الفيديو هذا الذي اراه الأن سبق و رأيته في حلم ما , في proccess ما ,, ,,

ملف الفيديو هاد ( المشهد الذي حدث امامك ) موجود لا محالة في ذاكرتك ,, و انت تذكرت هذ المقطع منه ..
من اين جاء ؟؟ كيف وصل ؟؟ لماذا ؟؟ من وضعه ؟ من استخدمه من قبل ؟ انا ؟ غيري ؟مستخدم أخر ؟ انا ولكن بشكل غيري ؟

تبدأ محاولا ً في هذه الاجزاء الصغيرة من الثانية ان تسترجع الملف و تقوم بـ recover له و لبياناته و خصائص دخوله
لتكمله , من بدايته الى نهايته ,, تحاول استرجاعه بطريقة قد تشبه ماتحدثنا عنه في -- ف.ت 2 -- مثلا
لكي تستطيع مشاهدته من خلال الdatabase في الـ ف.ت2 أو من خلال الـRAM الموجود لديك ,,
لانك تريد ان ترى ماالذي سيحدث الان ( فضول !)

هلئ سيقع قسم من اللبن على الارض !!
هل سيقع السطل كله بما فيه على الشاب والارض !؟
ام سيتدارك الموقف بشكل ما !!

هنا تماما ’ نحن أمام حاليتين :

الأولى : وهي الاكثر انتشارا بيننا , خصوصا للـusers العادي .
سترى ان الفكرة قد وقفت هنا ...او ان كل شيئ بالنسبة للfreez قد انتهى ..
وانت تكمل الـ process بشكل طبيعي , و ستقول لنفسك ::

حلمت اني شفت هالشي من قبل !
ايه ,, يا سيدي , كله خير ,,
ثم تقول للشاب : اي معلم , عطينا السطل لنحاسب و نمشي ..
و تمضي ..

او : الحالة الثانية : تحدث مع الـPro-user ( هو يوزر عادي ,, متله متل غيره , بس متمرس شوي ),
ركزت كتير بهالشغلات , وحاولت اني اتعمق شوي ,أو بمعنى اخر جهزت حالي لاقنص الوقت و استلغه بهيك حالة و كون مستعد لأنيScreen Capture و ما فكر اذا هالملف موجود او لاء !
و إنما جرب فوت و استبق نهاية " الـديجافو " هذا , و ارجع فيه للوراء شوي ( ف.ت3 )
مسرّعا عملية التفكير لاعلى الطاقات لأستغلال الاجزاء المجزئة من الثانية الهامة هذه ,, لارى بالتصوير البطيئ :
السطل وهو يتجهل للحافة ,, لكي يعلق !!
الان و ببطئ
يتجه .. يتقرب ... سيعلق ,,
انه الآن عالق من القاعدة و سوف يستمر الشاب بشده من الاعلى ,لذا _سوف_ يميل من الاعلى و يقع

هنا افاجأ .....

السطل لم يمل !! و لم يقع !! ,, بل تمت عملية سحب السطل بنجاح !! successful done

ايه ؟!؟! ,, لك كيف هيك !!

انا متأكد اني حلمت بهالمقطع و شفته ,,, و مو هيك _لازم _ يخلص !!
ما بيصير تكون هيك نهايته !

هون بئا .. تظهر لي رسالة مبطنة ,لا استطيع ترجمتها الى احرف
و لكني ارى ان مغذاها هو : ACCESS DENIED
انت الأن تدخل باللا مسموح به ,انت لست سو user ..
لست فئة الـ developer (انبياء ) و لا تستطيع ان تفكر بمحاولة الدخول الى منطقة الـ ADMIN

شيئ ما يحدث لا استطيع ترجمته أو فهمه مهما فكرت ...
لان مواصفاتي التي بنيت عليها اقل بكثير كثير عن صفات من خلقتني , سبحانه
لذا , لا املك القدرة على فهم ماللذي حدث في مثل هذه الحالة ...
هل هي رسالة تذكير و تأكيد بأن سر الغيب موجود عند الله وحده ؟
ام هي تأكيد على ان الأنسان مهما حاول التفكير .. تبقى له حدود معينة لا يستطع تجاوها .؟؟


هل هي كما يقول البعض ناتجة عما يسمى " التجييل " أو " التقمّص " أو " البعث من جديد "
يعني فلان من الناس هي مو اول مرة بيعيش فيها ,, كان عايش و مات ,, لذلك يوجد احداث
بذاكرته الـRAM ما تلفت تماما ؟

هل هذه ال"ديجافو " هي ثغرة في برنامج الحياة تصلنا منها معلومات عن مكان أو زمان ما بواسطة
قدرالت روحية ,, او ربما بواسطة ارواح بعض الأموات ,,
أم انها الروح عندما تسافر اثناء النوم و يتوفاها الله تعالى اليه ,, تزور في طريقها هذا بعض المناطق الخاصة
التي لا يستطيع بشر الوصل اليها ...


الحقيقة هاد الشي شجعني ارجع وكمل موضوع .. بيت النمل (سأقوم بإضافته لاحقا للمدونة)
(( يتبع قريبا ..))

السبت، شباط ٠٣، ٢٠٠٧

فاس توريماكس 3: العودة للوراء

قبل أن القراءة : قم بتغير إتجاه الصفحة من اليمين إلى اليسار و ذلك بالضغط على زر الفأرة الايمن و اختيار الترميز ( انكودينغ) و اختيار الاتجاه من اليمين إلى اليسار . كما يجب أن تقراء (فاس توريماكس 2 )


هاد يا سيدي ما انتو , كنت قاعد عم اصفن ...
و اذ بتجيني نوبة من نوبات الماس توريماكس ...

عم اصفن و عم اطلع عالحيط ..
حيط ّ!! ..
حيط ؟؟
طيب
الساعة هلئ 3:45 ... الساعة صارت 3:50 ...
و لساته حيط !!

ممم ,, طيب شو العلاقة بين الحيط ... و الساعة ؟؟

طيب : هلئ اذا قلنا متل بمسائل الفيزياء
---------
جملة المقارنة : خارجية
الجملة المدروسة = الحيط + جولدن
مركز الحيط = مركز المنظور و مركز الجولدن منطبق على الحيط
----------
ايواه
..
طيب
هلئ فهمنا انو في واحد شايف انو في جولدن واقف ناح حيط
...
طيب و الزمن وينو ؟

------

طيب
اذا حسبنا حالنا عم نتفرج من منظار هالشخص و كأنو عم نشوف فلم عالكمبيوتر
باستخدام الـ Windows media player مثلا او الـ Xing
رح نلاحظ انو في عنا شغلتين اساسيّتين الي هنن :
مربع الصورة ( الفلم )
و مسار الفلم ( زمن الفلم )

ممم

هلئ اذا انا صرت باخر الفلم مثلا
, معناتا انا شايف صورة جولدن صار باخر الصورة من طرف اليسار مثلا
((لانو انطلق من اليمين ))
و هلئ رح يخلص الفلم ,,
و رح يختفي الجولدن ,
و تصفى صورة حيط !
و يوقف الفلم

....

يا سلام... هلئ وصلنا للزبدة تبع هالفكرة .. اذا خلص الفلم ,, بيكون خلص الوقت ....

( اووم بئا )
أي جد . بيكون خلص الفلم

طيب
شو هو الوقت ؟ و شو علاقته بمؤشر الزمن ؟


ببساطة :
وقت نحن عم نشوف زلمة ماشي من ناح حيط , هو عبارة عن مجموعة من الصور عم تنعرض ضمن برنامج الدنية , عم تنعرض على شكل صور ورا بعض الفاصل بين الصورة و التاينة هو وحدة قياس تسمى الزمن!

يعني اذا مشيت من المين لليسار ,, عم يمضى الوقت و اذا ارجعت بالعكس , كمان الزمن عم يمشي

بس ..
الفرق انو الزمن عم يمشي بقيمية برمجية
= ++1 ( طول مافي حركة )
و بما انو اتفقنا انو كلشي بالكون في اله CLIDR ,, معناتا في شي واحد على الاقل لازم كرماله يكون في وقت !
مشان
تنحسب حركته
( مو انشتاين قال كلشي عم يتحرك بالكون ولو كان شكله ثابت .. انا بحترم هالزلمة و بئيده )

طيب
شو السبب اني مابحسن حرك المؤشر تبع الفيلم يلي عم شوفه لورا ؟؟

يعني .. اذا شايف قطة عم تنط من الشجرة لتحت ,, ليش مابحسن عيد هالمشاهدة وكاني عم شوف فلم ؟

هل لانو في كذا شي حولي بدويشوف الفلم باتجاه ++1
؟؟
( فالكترة تغلب الشجاعة ))
ام لانو البرنامج الرباني هاد بدو باسورد و دخول (صلاحيات ),,
و هالدخول ما بيكون الا باذن من رب العالمين ؟؟
يعني
انا من جماعة الـ
access denied هلئ متلي متل 99% من البشر!!!

بس
بتعرفو شو
.. بحس انو في خطا برمجي بالحياة احيانا .. بقصد ..
في ثغرة
.. و رب العالمين حاطتلنا ياها ليعرفنا بقدراته ( جلّ جلاله )
رح احكيلكن عنا بعد 4 اسطر ..
طيب
اذا يوما ما لنفترض رب العالمين حب يعطيني القدرة
, و بعتلي وحي ليعطيني الطريقة يلي بفك فيها شي كود من كودات الحياة .. واستطعت اعمل Debug لكود المشاهدة بواسطة اختراع الة الزمن
وضفت قيمة --1 .. يا ترى .. بحسن ساعتها شوف شو يلي صار.. كذا مرة ؟!!
يعني بضل بعيد و بفتئ باي مشهد عم شوفه بالحياة لحتى استوعبه !!؟؟

ممممم

هي اصبح بدها بئا نطرح موضوع الــ ف.ت 4 : الديجافو Deux javu !!

(( يتبع ))